-------------------
മന്ദിരങ്ങളില്‍ നിന്നിറങ്ങി വരുന്ന
തെരുക്കൂത്തു കലാകാരന്‍മാരേ,
നിങ്ങളെല്ലാവരും നഗ്നരാണ്.!
അത് പരസ്പരം വിളിച്ചു പറയില്ലെന്ന
ധാരണയിലാണ്
നിങ്ങള്‍,
മുഖത്ത് ചായം തേയ്ക്കുന്നത് !
(ഇടത്തേ ചൂണ്ടുവിരലില്‍ നിന്ന്
കറുത്ത മഷിയിറ്റി
ഞങ്ങളുടെ ശബ്ദം മാഞ്ഞു പോയിരിയ്ക്കുന്നു.)
എന്തിനാണ് കണക്കുകള്‍?
മരിയ്ക്കാന്‍ ഭയം നിങ്ങള്‍ക്കാണ്.
മാറാനും.
പ്രളയത്തിനു ശേഷം പറക്കുന്ന
സഡാക്കോ ചിറകുകള്‍ക്ക്
കടലിന്റെ നേരും
കടലപ്പാടത്തിന്റെ
ചൂരും കാണും.
അവയുടെ കണ്ണുകളില്‍ നോക്കുക.
ഓര്‍മ വേണം.
നിങ്ങളുടെ
വീടുകളില്‍ തെളിയുന്ന വെളിച്ചം
ഞങ്ങളുടെ മരണമാണെന്ന്.!
ബോധ്യപ്പെടുത്തല്‍ മതിയാക്കി
നിങ്ങളുടെ വിളക്കുകള്‍ കൊളുത്തിക്കൊള്‍ക !
No comments:
Post a Comment